UFD, a distribuidora eléctrica de Naturgy, investiu 85.000 euros para retirar o centro de transformación aéreo no dique (malecón) de Noia e reordenar toda a rede de distribución en baixa tensión na contorna, o que permitiu, en palabras da operadora galega, “eliminar o impacto visual da instalación eléctrica e mellorar o servizo na zona”. Con este retranqueo do transformador, a distribuidora eléctrica quixo “reafirmar o noso compromiso con Noia, xa que era unha demanda dos veciños”.
O delegado de UFD na provincia da Coruña, Emilio Castro, e o alcalde de Noia, Santiago Freire, visitaron este mércores 26 de febreiro o peirao de Noia, onde se retirou recentemente o centro de transformación, acompañados pola concelleira de Urbanismo e Obras, Laura Salgado, e a xefa de Operacións na zona de Noia, Soraya Morais.
Para o delegado de UFD na provincia da Coruña, Emilio Castro, “a retirada do transformador do dique de Noia cumpre co compromiso da distribuidora eléctrica cos veciños da zona. A actuación elimina o impacto visual na paisaxe, pero tamén permite a recuperación dun espazo público para Noia.”
Para o alcalde de Noia, Santiago Freire, “esta actuación supón unha mellora moi significativa no aspecto estético do malecón, ao eliminar o impacto paisaxístico que suponía o transformador aéreo e os postes sobre os que se sostiña”.
Desde o Consistorio tamén agradeceron os investimentos que está a realizar UFD en distintos puntos do termo municipal, “valorando moi positivamente a colaboración entre ambas as entidades e o compromiso e implicación da responsábel de UFD na zona”.
A compañía inclúe cada ano no seu plan de investimentos actuacións e iniciativas para potenciar as infraestruturas de subministración de enerxía eléctrica e mellorar a rede de distribución eléctrica, especialmente en zonas rurais, contribuíndo así ao desenvolvemento económico destes territorios e á mellora das súas condicións de vida.
UFD, distribuidora eléctrica de Naturgy, xestiona na provincia da Coruña preto de 24.500 quilómetros de rede de baixa e media tensión, preto de 10.300 centros de transformación e dá servizo a 731.000 puntos de subministración. En Galicia, dá servizo a case 1,6 millóns de puntos de subministración en 286 municipios das catro provincias galegas, a través dunha rede de máis de 61.000 quilómetros de liñas de alta, media e baixa tensión.
A distribuidora eléctrica investiu 206 millóns en 2024 na dixitalización e mellora da súa rede e infraestruturas en Galicia. Só nos últimos cinco anos, o investimento de UFD alcanzou os 800 millóns de euros para reforzar as súas infraestruturas en Galicia, co foco posto na mellora da calidade de servizo aos seus clientes.
