O conselleiro do Mar, Alfonso Villares, mantivo este 25 de febreiro un encontro de traballo co alcalde de Boiro, José Ramón Romero, para abordar asuntos de interese do municipio. Na xuntanza, o responsábel autonómico trasladou ao rexedor que Portos de Galicia ten previsto para este primeiro semestre a mellora da iluminación do porto de Cabo de Cruz mediante a instalación de sistemas de alumeado LED para crear espazos máis eficientes no consumo enerxético e aumentar a súa competitividade que permitirá un aforro enerxético de ata o 60%. Segundo explicou, “esta actuación na que se investirán 133 mil euros no municipio de Boiro, está enmarcada no plan de modernización dos sistemas de alumeado de 26 portos de titularidade autonómica que está dotado con 3,8 millóns de euros”.
O conselleiro, acompañado polo presidente de Portos de Galicia, José Antonio Álvarez, tamén deu conta do estado doutras actuacións previstas pola Consellería do Mar no municipio coruñés como “a rampla de varada que tamén dará servizo ao club de remo da localidade que se atopa parada á espera do preceptivo informe de Costas do Estado desde xullo de 2024”, sinalou, engadindo que en datas vindeiras está previsto sacar a concurso as naves portuarias baleiras de titularidade autonómica para poñelas a disposición do sector e, de non espertar interese, poñelas en mans do Concello.
Alfonso Villares tamén tratou co primeiro edil de Boiro a tramitación dos procesos de reversión dos terreos portuarios declarados innecesarios para a actividade portuaria. Nesta liña, o Concello ten previsto trasladar a Portos de Galicia a solicitude para dar inicio á tramitación, en liña co que se está a facer con outros concellos da comunidade. Explicou que estes procesos seguen os criterios técnicos acordados e ratificados previamente polo Goberno galego coa Federación Galega de Municipios e Provincias (FEGAMP) en base aos cales a Xunta proporá devolver ao Estado os terreos declarados innecesarios situados actualmente en dominio público portuario para a súa posterior transferencia ao Concello.
