A directiva da Asociación de Empresarios de Ribeira, encabezada polo seu presidente, Francisco Martínez Gude, mantivo este mércores 26 de febreiro unha xuntanza de traballo co alcalde, Luís Pérez Barral, e outros representantes do Concello e dos distintos grupos políticos que conforman o Executivo local. Durante o desenvolvemento da reunión abordáronse cuestións inherentes ao proxecto do novo polígono industrial, o Polígono de Pedras Vermellas, situado en Palmeira. A patronal instou ao Concello a materializar a compra dunhas parcelas situadas no municipio lindeiro da Pobra do Caramiñal, que son, segundo a asociación, “indispensábeis para a continuidade do expediente do polígono”. A entidade empresarial reclamou ao Executivo ribeirense que xa que as negociacións están xa rematadas nun caso e case noutro, sexa levada a cabo a compra e “se proceda ao necesario trámite de rexistralas para poder así avanzar e dar paso á licitación das obras”.
Na xuntanza tamén se abordou a cuestión da variante, o proxecto de circunvalación de Ribeira, e ao abeiro deste proxecto a patronal solicitou ao Concello que faga público o estudo da alternativa que “puidese, ou non, ser factíbel de realizarse con outro trazado, para unha vez coñecedores do contido do mesmo, solicitar da Xunta que dote de orzamento e continuar coas obras desta vía”.
Para ambos os asuntos, así como outros tratados, o equipo de Goberno comprometeuse en resolver coa maior celeridade estes expedientes. Pola parte da asociación de empresarios, o presidente declarou que “coma noutras ocasións manifestamos ao Concello a nosa disposición en colaborar para que dunha vez por todas poidamos ver estas obras en marcha”.
