Blas García, alcalde de Ames; Anxo Arca, alcalde de Padrón; Xavier Castro, alcalde de Dodro; Julián Bustelo, alcalde de Rianxo; José Ramón Romero, alcalde de Boiro; José Carlos Vidal, alcalde da Pobra; e Luís Antonio Pérez, alcalde de Ribeira; asinaron este 25 de febreiro, no Pazo da Peregrina de Bertamiráns (Ames) un manifesto dirixido ao Ministerio de Transportes e Mobilidade Sostíbel reclamando a constitución dunha mesa de traballo entre o Ministerio e os Concellos afectados directamente polas tarifas da AP-9, que teña como obxectivo final “a gratuidade da mesma”.
Solicitan ao Ministerio que realice un estudo e determine un calendario para unha liberalización en fases da AP-9; e que se analice a posibilidade de ampliar a zona libre de peaxes da área de Santiago ata Padrón, facilitando o enlace gratuíto da AP-9 e a AG-11. Insisten no manifesto “na importancia de abordar esta situación dende unha perspectiva municipalista, apartidista e dende un punto de vista realista, poñendo ás persoas no centro do debate e articulando un plan en varias fases que teña como obxectivo final a gratuidade da autoestrada do atlántico”.
O alcalde de Ames, Blas García, foi o encargado de tomar a palabra en primeiro lugar en representación do grupo dos sete Concellos que crearon unha fronte común co obxectivo de reclamar a gratuidade da AP-9. Blas García dixo que “isto xorde dunha proposta feita polo Concello de Ames e á que se foron unindo os Concellos de Padrón, Dodro e mailo Concellos do Barbanza. O que pedimos é fundamentalmente dúas cousas; a primeira é que se nos teña en conta aos Concellos á hora de falar da liberalización ou gratuidade da AP-9, e por outro lado, pedimos que esa liberalización se faga dunha vez se é posible, e se non, que se comece polo tramo da peaxe de Padrón”.
O rexedor amesán continuou dicindo: “As razóns son obvias, a comarca do Barbanza é unha peza fundamental da comunicación coa capital de Galicia e a maioría de coches que pasan por Padrón, Dodro e O Milladoiro, son vehículos que, no caso de ter liberada a peaxe, seguramente non cruzarían os nosos núcleos urbanos xa que son de fóra dos nosos respectivos concellos. Os datos que temos reflicten que só un terzo dos vehículos que cruzan O Milladoiro son desta localidade, o resto son vehículos que proceden de fóra. Dentro da política de humanizacións que se está acometendo, que ademais se recomenda por parte do Goberno central e de Europa, que mellor para favorecer esas humanizacións que dispor dunha AP-9 libre de peaxes”.
En representación dos Concellos do Barbanza interviu o alcalde de Rianxo, Julián Bustelo, que subliñou “a pesar de que a AP-9 non pase polo Barbanza, aos cidadáns e ás empresas da zona cáusanos unha serie de prexuízos, entendemos que no caso de que se revertera a situación, melloraría moito a nosa posición estratéxica e a competitividade das nosas empresas. Ademais o uso da estrada nacional causa diferentes problemas nos municipios e tamén supón un risco para os propios usuarios por temas de seguridade, xa sexa por deterioro ou por puntos perigosos da estrada”.
Manifesto vivo e aberto
Este é un documento “vivo e aberto”, sinalaron, engadindo que é susceptíbel de cambios e que permite a adhesión de todos aqueles Concellos que compartan esta nova abordaxe para a liberalización da autoestrada AP-9.
Blas García asegurou que con esta xuntanza “buscamos que todos aqueles Concellos que apoien a nosa proposta, que é a liberalización da AP-9 e crear unha mesa na que teñamos participación os Concellos, poidan sumarse a ela, sexan da provincia da Coruña ou de Pontevedra, porque é importante a unión entre nós”.
