O Concello de Noia compartiu o programa de actividades dos festexos locais do Entroido 2025, que comezan o luns 3 de marzo cunha festa infantil “chea de diversión” que incluirá unha actuación co músico galego ídolo da rapazada Paco Pakolas, con agasallos para as crianzas disfrazadas que demostren o seu talento choqueiro e con sorteos especiais. Será a partir das 17.00 horas no Pavillón de Deportes Alonso Rodríguez.
O mércores 5 de mazo, Mércores de Cinza, tamén será un dos días grandes do Entroido noiés, coa celebración do tradicional Enterro da Sardiña acompañado dunha ruada musical (amenizada pola comparsa Os Solfamidas) e culminado cunha chocolatada benéfica a favor de Cáritas (donativo de 1 euros). A saída do Enterro da Sardiña está programada para as 20.30 horas do Mércores de Cinza, dende O curro.
O Venres de Piñata (venres 7 de marzo) o Entroido de Noia chegará a outro dos seus puntos álxidos, coa celebración da XXXIX edición do Rally París Dakar, con saída da explanada de Labarta ás 21.00 horas, e cun percorrido que pasará polo Paseo Antón Avilés de Taramancos e as rúas Francisco Romero Blanco, Calvario e Rosalía de Castro. Está prevista a actuación da charanga BB+ e da disco móbil Chocolate. O desfile virá con mancheas de premios, cunha contía total de 7.000 euros a distribuír entre as propostas máis creativas das categorías individual, familias, comparsas e grupos.
