O Concello de Boiro recibe da Deputación da Coruña unha subvención por importe de 15.000 euros para financiar gastos de persoal técnico nos servizos municipais de cultura en 2025. O importe da subvención concedida vaise destinar a financiar os gastos de mantemento do persoal técnico que desenvolve as súas funcións no departamento.
O Concello de Boiro lembra que conta cun departamento de Cultura que se ocupa de “deseñar, programar e impulsar actividades no municipio que favorezan a promoción e difusión da programación cultural”. Ademais elabora propostas de programas propios como axendas culturais para todo o ano e tamén en datas específicas como o Entroido, Letras Galegas, Festas do Verán, Nadal… A Administración local tamén dispón de equipamentos culturais nas distintas parroquias do municipio, “polo que se trata dun servizo descentralizado que leva a axenda local de actividades aos distintos centros socioculturais”, explican fontes do Consistorio, engadindo que o departamento de Cultura xestiona asemade “as distintas salas de exposicións dos centros e tamén a xestión dos salóns de actos e aulas nos que entidades e colectivos desenvolven programacións propias”.
