A banda barbanzá Heredeiros da Crus, referentes do panorama rockeiro en galego e abandeirados do movemento bravú, regresan este mes de febreiro cun novo single que marca outro fito na súa carreira, De-Nunzia-nos, que podemos escoitar xa nas plataformas e que se suma ao primeiro single extraído do novo LP, Convensido. Con este tema, cunha colaboración única coa cantante italiana Nunzia Giannotta, os Heredeiros buscan dar “unha volta á súa esencia coa mestura de irreverencia e diversión que os caracteriza desde sempre”.
O sinxelo é o segundo adianto de Tranquimasin, o próximo traballo da banda que chegará o 21 de febreiro acompañado de sorpresas especiais para os seus seareiros. O álbum contará con doce temas (“12 miligramos de pura adrenalina”) que comparten o obxectivo de seguir mantendo viva, e alentando, a conexión co público que levan cultivando ao longo de máis de tres décadas. A edición física verá a luz nunha data posterior.
Nas súas palabras, De-Nunzia-nos ten “o noso son inconfundíbel e mestúrao cunha interpretación que reflicte tamén a retranca que sempre foi a marca da casa”.
A publicación de Tranquimasin abre tamén o camiño para unha xira. Entre as datas xa confirmadas, destacan citas como o Resurrection Fest en xuño, o Silfest en xullo e o Revenidas en setembro.
Con máis de trinta anos de traxectoria, Heredeiros da Crus segue sendo un símbolo do rock feito en Galicia, ofrecendo temas que conectan con xeracións enteiras.
