O Auditorio Municipal de Rianxo vai dar acollida o vindeiro 22 de febreiro, a partir das 19.00 horas, á representación da peza de teatro musical infantil O mundo máxico de Pinocho, a cargo da compañía de Educateatro. Trátase dunha función escénica que combina a maxia, o teatro e a música. A entrada será de balde até completar capacidade. A retirada de convites na billeteira cómpre facela no Auditorio dende unha hora antes do comezo da función (máximo 2 por persoa). Duración: 60 min. Público familiar.
Proposta ao abeiro do programa Rede Cultural 2024 da Deputación da Coruña.
Sinopse: En O mundo máxico de Pinocho, o público atoparase cunha curiosa adaptación ao teatro musical do clásico de Carlo Collodi. Unha historia contada a través dos ollos de Pepiño Grilo, que xunto coa Fada Mimadriña, Raposo e Gato acompañará a Pinocho no camiño de converterse nun neno de verdade. Un camiño que comeza no taller de Gepetto, e que pasará pola escola, por un circo de monicreques onde un malvado titiriteiro intentará raptalo e ata pola barriga dun peixe xigante. Todo para que o protagonista aprenda que dicir mentiras ten as súas consecuencias.
