O Concello de Noia, a través do Centro de Información á Muller (CIM) e a Concellería de Servizos Sociais, elaborou este ano un completo programa de actividades para celebrar o Día Internacional da Muller, este 8 de marzo.
Será unha axenda participativa que inclúe actividades programadas para o mes de marzo pero tamén para o mes de abril.
A celebración comezará, precisamente, o sábado 8 de marzo, coa lectura dun manifesto institucional e unha Andaina pola Igualdade con saída e chegada na praza do Concello.
Pola tarde, a partir das 16.30 horas do 8 de marzo, celebrarase unha sesión de papaventos pola igualdade, na praza do Tapal.
As actividades proseguen o 20 de marzo cun obradoiro de risoterapia.
Ademais, entre o 26 e o 28 de marzo celebrarase un obradoiro de xabóns medicinais.
A axenda rematará o 1 de abril cunha peza teatral dirixida ao alumnado de Secundaria do concello de Noia. Representará a obra Golpes, da compañía aAntena e protagonizada pola actriz galega Estíbaliz Veiga, que pon en escena un relato cru e directo polo cotiá das accións de como unha moza vai cedendo nunha relación desigual ata irse atopando fóra da súa personalidade. Trátase dunha peza que afonda dun xeito directo e fuxindo do tráxico en como nas accións máis cotiás nace o “golpe” da desigualdade e chega á violencia machista.
As inscricións para participar nestas actividades do CIM haberá que facelas a través do teléfono 981 828 001.
