Seguen a mostras de solidariedade co Club de Remo da Pobra (Club de Remo Puebla), logo do incendio que destruíu este mes de xaneiro as súas instalacións e boa parte das embarcacións gardadas na súa sede. Desta volta os apoios veñen novamente dun Concello irmán: o de Ribeira. Máis polo miúdo, chegan da man da Escola de Boxeo El Canario e o Club de Natación de Ribeira, en colaboración co Concello, que presentaron este 28 de xaneiro os detalles da Carreira e Andaina Solidarias en beneficio do club de remo do veciño municipio.
Á presentación acudiron o concelleiro de Deportes, Xabier Vidal, o concelleiro de Mar, Fernando Abraldes, a responsábel da Escuela de Boxeo El Canario, Clara Millares, o responsábel do Club de Natación Ribeira, Juanky Ageitos, e Adrián González e Moncha López, remeiros do Club de Remo da Pobra.
Xabier Vidal introduciu a presentación agradecendo aos clubs a iniciativa solidaria e anunciando que esta carreira e andaina dará comezo o vindeiro 2 de febreiro ás 11:00 h no Complexo Deportivo da Fieiteira na pista de atletismo.
A contribución solidaria para a andaina será de 5 euros, a mesma cantidade para as carreiras de 5.000 m. (Sub 16 en adiante), a de 2.000 m. e a (Sub 12/Sub 14) de 1.000 m. (familiar). Serán de balde a de 500 m. (Sub 10/Sub 8) e a de 100 m. (Sub 4/Sub 8). As inscricións faranse o mesmo día de 9:30 até as 10:45 da mañá.
Clara Millares apelou á solidariedade e a empatía: “Os que formamos parte dun club poñémonos no seu lugar, o traballo de tantos anos e perdelo todo nunhas horas non é doado e faise moi duro”, e tamén indicou que a andaina serán uns 6 quilómetros até a Pedra da Ra “baixando polo parque de San Roque, despois de cara ao final faremos sorteos que aportan diferentes empresas dos dous concellos”, finalizou animando á veciñanza a participar.
Adrián González, do Club de Remo da Pobra, agradeceu “enormemente este xesto dos dous clubs de Ribeira, o feito de que outros clubs empaticen con nós que saben o que consta unha actividade sen ánimo de lucro, e a pesares de ser entidades doutro municipio, estamos encantados” e continuou sinalando que “xa non é só o que se recade senón o xesto de solidariedade de compartir unha mañá de domingo de actividade física ao aire libre, esperamos que veña bo tempo e animamos a compartir unha mañá saudábel”.
Para rematar Adrián comentou que o Club de Remo da Pobra continua coa campaña especial de socios colaboradores con contía anuais de 30, 35 e 60 euros ao ano: “Logo temos un canal solidario de bizums e transferencias que son desgravábeis na declaración da renda ao 80% todo o explicamos nosa redes sociais”.
Para finalizar o concelleiro do Mar tamén quixo agradecer aos dous clubs de Ribeira por esta importante iniciativa “dende o equipo de Goberno de Ribeira sempre haberá unha man tendida para ste Club de Remo da Pobra para o que precisen”.
