O PSdG de Noia, a través do seu voceiro Fran Pérez, emitiu un comunicado no que denuncia e critica a xestión levada a cabo polo Concello en relación ao Museo Mar de Noia, un proxecto que malia ter custado preto de 1 millón de euros “permanece pechado e sen prestar servizo a maior parte do tempo durante o ano”, sinalan os socialistas, engadindo que o actual proxecto do Museo do Mar de Noia foi executado en varias anualidades e en
dous proxectos, o primeiro deles, o proxecto de ampliación do inmóbel, con orzamento de 665.000 €, que recibiu do GALP unha subvención de 200.000 €, dos cales o 85% corresponden a fondos FEMP e fondos europeos. O segundo, Noia a voz do mar, mobilizou un orzamento de 209.000 €, que tamén recibiu subvencións do GALP, por importe de 183.515 €, tamén o 85% con fondos europeos. Os socialistas. malia todos estes recursos postos en xogo, din que o inmóbel “non cumpre cos seus obxectivos de funcionamento e servizo; e así, agás en determinados meses do ano, principalmente no verán, as instalacións fican pechadas a cal e canto día tras días, con esporádicas e puntuais aperturas, ou con motivo de visitas oficiais”.
No comunicado o PSOE local di que na memoria presentada para obter as axudas que finalmente foron concedidas fálase dun modelo de co-xestión do recurso, que textualmente indica: ”O museo será xestionado como ata a data pola Asociación do Museo do Mar, se ben contémplase a posibilidade de contratar no futuro a persoal se a demanda do museo así o require”. Os socialistas sinalan a respecto disto que este modelo “non chegou a producirse”. Ademais, critican que “as actividades previstas na memoria tampouco se están a levar a cabo coa intensidade que o investimento do proxecto implica”. Por outra banda, sinalan que na ficha en Google do Museo do Mar, unha das fontes de información máis importantes para calquera
visitante, indicase claramente: “Temporalmente cerrado”.
Por estes e outros motivos, a agrupación insta ao Concello de Noia a que “tome as medidas necesarias para poñer en funcionamento este recurso turístico, xustificando así o investimento realizado”, e convidan tamén aos organismos correspondentes a que “fagan as inspeccións necesarias para saber se se pode estar incumprindo algunha das condicións ou requirimentos baixo os que foron concedidas as axudas”.
