O temporal Herminia e os seus fortes ventos leváronse por diante este domingo 26 de xaneiro a cuberta da Piscina Municipal de Noia, arrincándoa da estrutura que termaba dela cos seus refachos de máis de 120 quilómetros por hora. O Concello, a través do alcalde Santiago Freire, fixo saber que o inmóbel xa foi acordoado e que nada máis desprenderse da estrutura que a suxeitaba os operarios municipais puxéronse mans á obra para apañar todo o material que puidera poñer en risco á veciñanza. Finalmente non houbo que malestar danos materiais. O Concello explicou nas redes que “debido aos desperfectos ocasionados polo temporal, a Piscina Municipal de Noia ficará pechada ata novo aviso; estamos a traballar para avaliar os danos e garantir a seguridade de toda a instalación”. Tamén se fixo saber que durante o tempo que duren os arranxos, non se cobrará a cota aos seus usuarios. “O máis importante é garantir a seguridade de todos, e agradecemos a vosa comprensión ante esta situación”, concluíu o Concello.
