O Centro Maruxa e Coralia, centro social do centro histórico de Santiago de Compostela, acollerá este sábado a xornada de formación para docentes Fai memoria, impulsada pola área de dereitos civís da Deputación que lidera a deputada de Outes, Soledad Agra. O obxectivo da iniciativa é “aportar recursos, formación e información sobre memoria histórica, así como impulsar o intercambio de experiencias entre docentes”, sinalou Agra. As persoas interesadas en participar poden inscribirse a través do correo electrónico faimemoriaxornada@gmail.com.
Diferentes autoras explorarán a literatura como recurso para a memoria, centrándose no teatro, a novela, a poesía e o album ilustrado. Pilar Sampedro comezará presentando a guía Memoria Histórica na LIX galega. Posteriormente haberá unha mesa con Paula Carballeira, autora de As alumnas (Premio Nacional de Teatro) e Daniel no Peirao; Iria Morgade, autora de Quen escribirá a miña historia?, que falará sobre A memoria debuxada; Carme Vidal (O triángulo vermello, a historia de Mercedes Núñez), que impartirá a charla Pequena Memoria; Susana Aríns, sobre Poesía e memoria familiar: Seique, e Carmen García Facorro e Javier Castiñeira García, de Amorodio Teatro, que abordarán A memoria silenciada das irmáns Touza: A nai.
Experiencias de memoria nas aulas
Máis tarde, haberá unha mesa na que diferentes centros e asociacións compartirán experiencias sobre o tratamento da memoria nas aulas. Serán o IES plurilingüe Xosé Neira Vilas (A Coruña); o IES Sánchez Cantón (Pontevedra); a AC Alexandre Bóveda (A Coruña) e Feminismos no Tempo.
Xornada de tarde
Pola tarde, haberá un roteiro pola memoria das mulleres en Compostela a cargo de Encarna Otero; unha sesión sobre memorias invisibles con Daniela Ferrández (A historia da disidencia sexual galega) e Cristina López Villar (Mulleres pioneiras no deporte) e a exposición de Sinaladas. Represión e loita das mulleres no século XX, con Montse Fajardo, Beatriz Maceda e Eli Ríos.
