O conselleiro do Mar, Alfonso Villares, visitou este xoves 9 de xaneiro ás instalacións de Conservas Sotavento, situadas no concello de Outes, onde salientou “o bo facer, experiencia e profesionalidade do conxunto da cadea mar-industria galega” e, tamén “a contribución das empresas transformadoras á imaxe de calidade e sostibilidade dos produtos pesqueiros galegos”.
O responsábel autonómico, acompañado pola delegada territorial da Xunta en Coruña, Belén do Campo, pola directora xeral de Desenvolvemento Pesqueiro, Marta Villaverde, e polo alcalde Manolo González, puido coñecer da man dos responsábeis da firma o proceso manual e tradicional co que elaboran as súas conservas con produto de proximidade como o polbo, o mexillón, as navallas ou as algas que son comercializadas por toda España.
O titular de Mar resaltou a importancia de poñer en valor o produto procedente das rías galegas, que, segundo dixo, “é sinónimo de excelencia. Tamén salientou “o papel que xogan nesa tarefa o impulso de marcas de calidade como Pulpo de lonja, comercializada a través de Lonxa na Rede e impulsada polo Grupo de Acción Local do sector pesqueiro 4, con produto procedente das confrarías de Fisterra, Corcubión, Lira, Muros, O Pindo e Porto do Son”.
Na visita tamén participaron algúns dos rexedores destes concellos, como por exemplo Luis Oujo, alcalde sonense.
Lembrar que Conservas Sotavento puxo en marcha co apoio da Consellería do Mar, unha nova liña de transformación e comercialización da sardiña procedente da frota pesqueira galega coa finalidade de elaborar conservas e semiconservas, introducindo novas tecnoloxías que aporten valor engadido. O obxectivo é ofrecer un formato adaptado ás demandas dos consumidores, apostando por un produto de calidade, de proximidade e altamente nutritivo así como sostíbel e, a vez, desestacionalizar o consumo desta especie. Nunha primeira fase foron fabricadas 1.500 latas co obxectivo de elevar a produción ata as 50 mil-100 mil unidades, coa súa introdución no mercado estadounidense no horizonte.
