Porto do Son comezou o ano con novos recoñecementos urbanísticos e arquitectónicos, que sumar a iniciativas como a remodelación da fachada marítima sonense ou a Surf House de Miñortos e que engadir a proxectos acabados de estrear como o Club de Xubilados. Agora os especialistas en novos e sustentábeis xeitos de construír e deseñar vilas e cidades poñen o foco no núcleo de Nebra, cuxa recuperación-humanización levada a cabo por José Carlos Seoane González foi nomeada finalista da Open Call na 19º Exposición Internacional de Arquitectura na Bienal de Venecia. Foi o único proxecto seleccionado dun total de 32 finalistas de toda España,
Na actuación levada a cabo na contorna da igrexa de Santa María destacan “a recuperación do carácter orixinal do lugar e a mellora da accesibilidade dos camiños”. A intervención pretendeu rescatar o carácter orixinal, a través do debuxo xeométrico do curso da auga por medio da rúa, deseñado a través de métodos construtivos artesanais por artesáns locais.
Entre os traballos executados no lugar, salienta tamén a renovación da pavimentación da contorna con empedrado de granito silvestre e a mellora da accesibilidade dos seus espazos públicos, adaptándoos así ás necesidades actuais da poboación.
Ademais, levouse a cabo a canalización da rede eléctrica e de telecomunicacións, e colocáronse varandas e pasamáns de aceiro inoxidable en puntos con maior dificultade por mor das pendentes existentes.
O alcalde de Porto do Son, Luis Oujo, quixo trasladar “os parabéns a José Carlos Seoane por este recoñecemento que sitúa a Porto do Son no mapa a nivel internacional e pon en valor a humanización dunha zona que busca conceder protagonismo aos peóns e recuperar a orixinalidade e singularidade do lugar de Nebra”.
