A reforma do bordo portuario da vila de Porto do Son, impulsado polo Concello e a Xunta para devolver á localidade o seu estreito e histórico vencello co mar ao tempo que se engadiron importantes elementos de humanización e reforma de materiais e infraestruturas, vén de obter un importante recoñecemento: o Premio da Bienal Española de Arquitectura e Urbanismo, XVI edición. O proxecto foi desenvolvido por Juan Creus e Covadonga Carrasco e r v r arquitectos (Marcial Rodríguez, José Valladares e Alberto Redondo).
O xurado da Bienal salientou os recursos despregados neste proxecto para recuperar o que se perdeu no proceso de incorporación, ao longo do tempo, de recheos e novos edificios, o que levou, sen a debida configuración urbana, á perda de identidade do antigo porto. “Apareceron elevados bloques de vivenda e unha presenza dominante do coche, que condicionou e acaparou gran parte da superficie do espazo urbano orixinario”, sinalou o xurado, engadindo que “a difícil convivencia entre tráfico portuario e cidadán, sumada ao aparcamento masivo e a crecente actividade comercial deste lugar emblemático, de 25 843 m2, motivou a transformación de Porto do Son”.
Así, “a contorna e a praia do Cruceiro foron recuperadas como espazo de entrada e suxeridas como miradoiro arborizado, o muro de contención aproveitouse como paseo e a urbanización resultante, pautada en pavimentación e masas arbóreas, facilita agora novos usos e novos significados a un espazo onde dialogan o formigón devastado, a pedra e a terra, ao que se suman chanzos, bancadas e balcóns”. O xurado tamén salientou a recuperación, preto do mercado, “dunha estrutura de postes e trabes de madeira que devolve a memoria dos secadoiros de redes como soporte de actividades cidadás, desde cinema e exposicións a concertos, mercado e outras futuras”.
Tamén se pon o foco nas dúas grandes superficies que complementan a festa (unha libre, de pedra, e outro arboredo, sobre terra), no paseo do bordo, no novo club náutico e no miradoiro cara ao monte Louro e a ría Muros-Noia.
A bienal é unha iniciativa do Ministerio de Transportes, Mobilidade e Axenda Urbana en colaboración co Consello Superior de Arquitectos de España e a Fundación Arquia. Nesta ocasión o lema elixido foi Me-dio Pla-zo, en alusión a que “neste presente onde superamos diversas situacións de crises, a arquitectura, ademais de dar respostas eficientes ás necesidades de hoxe, pode indagar nas inquietudes do mañá”.
