Respecto das propostas para a rapazada que preparou o Concello para este Nadal, a Área de Xuventude sinalou que entre o 23 de decembro ao 4 de xaneiro as nenas e nenos de Rianxo poderán desfrutar de actividades diarias tanto en horario de mañá como de tarde, a través do programa Ludonadal. Así o sinalou a concelleira Ana Vidal, que presentou as actividades programadas para a rapazada durante as próximas semanas. Na carpa habilitada no centro de Rianxo haberá obradoiros, inchábeis, zona multimedia, xogos tradicionais, recuncho de lectura, visita de personaxes infantís, etc. Ademais, o programa inclúe un servizo de canguraxe, o Merca-concilia, para que as nais e os pais poidan facer as súas compras no comercio local mentres deixan aos seus fillos até dúas horas na Escola Infantil Agarimo. E ademais, do 26 ao 30 de decembro, poderán gozar da pista de minigolf que haberá no Pavillón Municipal José Manuel Abuín “Chema”.
