Este 26 de decembro de 2024, arredor das 20:25 horas, axentes localizaron a un condutor de 55 anos na rúa Arcos Moldes, no municipio de Rianxo, que amosaba claros síntomas de atoparse baixo os efectos do alcohol. A intervención produciuse despois de recibir varias chamadas alertando de que o vehículo conducido por esta persoa circulaba de maneira errática por rúas do casco urbano e por outras zonas próximas, invadindo en ocasións o sentido contrario e as beiravías.
Cando foi requirido polos axentes, o condutor negouse a realizar as probas de alcoholemia regulamentarias e desobedecía reiteradamente as ordes dos efectivos de seguridade.
Por estes feitos, instruíronse dilixencias por dous presuntos delitos contra a seguridade viaria: un por conducir baixo os efectos de bebidas alcohólicas e outro por negativa a someterse ás probas establecidas. O acusado foi citado para un xuízo rápido.
