O Concello de Noia confirmou que este mes de decembro seguen a desenvolverse os traballos encamiñados a mellorar a operatividade da Estación de Tratamento de Auga Potábel (ETAP). Na mañá deste mércores 18 de decembro o alcalde, Santiago Freire, e o concelleiro de servizos do Concello de Noia, Santi Rodríguez, visitaron as obras que permitirán modernizar a planta e ampliar a capacidade actual da potabilizadora para servir ata 24.000 habitantes. Informaron tamén que a ETAP disporá dun pretratamento completo, dúas bombas somerxíbeis, e tecnoloxías para automatizar os procesos. Ademais, procederase a reformar a instalación eléctrica das instalacións. Esta actuación conta cun investimento de preto de 1,5 millóns de euros da administración autonómica, segundo confirmaron o rexedor e mais o concelleiro de Servizos.
