A delegada da Xunta na Coruña, Belén do Campo, visitou este 17 de decembro o Polígono Industrial de Rianxo para supervisar a actuación realizada, cun apoio da Xunta de case 59.000 euros, que permitiu o acondicionamento dos accesos ao complexo empresarial.
Segundo lembrou, realizáronse melloras nas vías de acceso dende Asados e dende Taragoña ao Parque Empresarial de Te, de renovación e mantemento do firme a través da reposición completa e un acondicionamento da zona para dar comodidade e continuidade ás saídas a partir do polígono existente, que conta a día de hoxe cunha vintena de empresas.
Esta orde recolle ata un máximo de 120.000 euros por proxecto, e está destinada á implantación de iluminación pública eficiente, plantas de depuración de auga, xestión de residuos, instalación de sistemas de seguridade, contraincendios e contra o roubo de cable, servizos centralizados de subministración de gas e hidróxeno verde, así como á mellora de infraestruturas viarias (a actuación máis demandada).
A delegada da Xunta explicou que esta liña de axudas “contribúe a apoiar aos concellos galegos e pretende ser, ademais, un impulso para a captación de investimentos en Galicia e para a mellorar a competitividade das nosas empresas”.
Belén do Campo lembrou que esta orde da axudas repartiu na comarca do Barbanza máis de 200.000 euros entre Noia, Boiro (2 axudas) e Rianxo, a provincia da Coruña contou con 1,8 millóns de euros para apoiar a 26 parques empresarias e os polígonos industriais de Galicia contaron cun orzamento total de 3,5 millóns de euros.
