Este venres 20 de decembro celebrouse a carón do Centro de Saúde de Aguiño unha nova concentración veciñal destinada a reclamar unha solución definitiva á falta de persoal e unha mellor cobertura sanitaria no centro. Xuntáronse novamente centos de veciños, acompañados de representantes do Bloque Nacionalista Galego. Reclamaron novamente “unha sanidade pública digna”, denuncia que contou co respaldo activo de membros do BNG.
O alcalde de Ribeira, Luís Pérez Barral, asegurou que “non parará ata que todas as prazas médicas e sanitarias estean cubertas porque é xusto que a veciñanza teña unha atención sanitaria de calidade, sen esperas interminábeis”. E engadiu: “Estarei ao lado dos meus veciños o tempo que faga falta, porque o primeiro ao que me debo como alcalde é aos seus intereses. Reclamarei sempre o que é de xustiza e un dereito básico e esencial como é a saúde”, subliñou.
Denuncia da situación actual
O BNG lembra que, a día de hoxe, “os centros de saúde de Ribeira e Aguiño carecen de catro médicos e un profesional adicional no Punto de Atención Continuada (PAC), unha situación que está a provocar esperas de ata tres semanas para obter unha cita; e ademais moitas persoas vén obrigadas a recorrer a servizos xa saturados, como o PAC ou as Urxencias do Hospital Comarcal da Barbanza”.
O BNG denuncia que “o caso de Aguiño é especialmente grave, xa que chegou a quedar sen ningún médico dispoñíbel. A solución provisional da Consellería de Sanidade foi trasladar unha médica desde Ribeira, unha medida que só transvasa o problema dunha localidade a outra, sen achegar unha solución real”.
O rexedor ribeirense destacou “que o Goberno local enviou varios escritos ao conselleiro de Sanidade solicitando a cobertura inmediata das dúas prazas vacantes no consultorio periférico de Aguiño”. A este sentido, explicou que “unha destas prazas quedou vacante por xubilación do titular, e a outra correspóndese cunha baixa de longa duración; actualmente, unha soa doutora está atendendo en Aguiño para cubrir dúas ausencias, o que provoca que haxa pacientes que non podan recibir atención sanitaria nin obter cita en Atención Primaria”, engadiu o alcalde.
Dende a organización nacionalista criticaron as declaracións do Partido Popular no Parlamento Galego, nas que se acusaban a Aguiño de ser “hostil” co Goberno da Xunta de Galiza.
Para o BNG, “a mobilización de hoxe puxo de manifesto o profundo malestar da cidadanía pola falta de recursos sanitarios”. E engadiu: “É imprescindíbel que a Xunta tome nota do clamor popular e adopte medidas inmediatas que garantan unha atención de calidade. Esta loita non é só do BNG, é de toda a veciñanza de Aguiño e Ribeira, que merece unha sanidade pública forte e eficaz”.
