Este sábado 23 de novembro represéntase en Rianxo Unha Rosa é… unha Rosa, función representada polo grupo A Tenencia Teatro (o grupo da Agrupación Instrutiva de Caamouco que dirixe Eugenia Sanmartín) e baseada no texto de Suso de Toro.
Unha rosa é unha rosa (Unha comedia de medo) é unha traxicomedia do escritor compostelán Suso de Toro que nos conta con humor e crítica á sociedade contemporánea a historia da vella Rosa, que reparte a súa herdanza en tres partes, entre os seus dous sobriños, Pololo e Adela, e a filla doutra sobriña xa morta.
A vella Rosa é seguidora na televisión dos telefilmes do detective tenente Colombo, do que sabemos da súa ascendencia galega. A morte da vella Rosa, en estrañas circunstancias, desencadeará unha divertida trama de enredo, parodia da ambición desmedida da sociedade actual, que rematará cunha inevitable hecatombe tráxica.
