O Concello de Boiro celebrou unha nova sesión do Consello Escolar Municipal no que, entre outros temas, se falou das necesidade de profesionais nos centros. A sesión estivo presidida polo alcalde, José Ramón Romero, e a concelleira de Educación, Carmen Silva, ademais dos distintos axentes implicados.
O Consello Escolar Municipal puxo de manifesto unha demanda xeneralizada de todos os centros de ensino da necesidade de aumentar a contratación de profesionais de PT e AL, así como coidadores nos centros educativos.
Na xuntanza fíxose tamén unha valoración do proxecto EnClave 2024/2025 que se está a desenvolver e no que o Concello de Boiro inviste 65.000 euros este ano para abordar de maneira integral os desafíos que enfrontan os estudantes no seu desenvolvemento emocional e social.
O Consello Escolar Municipal reúnese de xeito periódico durante o curso escolar para detectar e dar solución aos problemas e necesidades xurdidas no ámbito educativo. Este órgano, no que está representada toda a comunidade educativa do municipio, está en condición de ofrecer unhas perspectivas de interese xeral que axuden a clarificar e resolver aquelas problemáticas detectadas no eido escolar.
