O Concello de Muros puxo en marcha o ano pasado unha campaña para reivindicar o consumo responsábel e o comercio de proximidade, facendo fronte a outras tendencias propias do mes de novembro, como o Black Friday. A campaña Muros Consciente regresa este ano “cunha gran implicación de todo o concello que agradezo”, explicou na tarde deste 22 de novembro a alcaldesa, María Lago, nun acto no Mercado Municipal para presentar as accións da iniciativa, nada o ano pasado para “concienciar sobre a necesidade dun consumo sostíbel, ademais de apoiar ao comercio local a loitar contra as prácticas consumistas desta época nas grandes superficies”.
A rexedora explicou que “trala implicación que tivo o comercio local o ano pasado, este ano queremos implicar á hostalaría e por suposto á comunidade educativa e a veciñanza”.
Laura Rivadeneira, concelleira de Ensino e Promoción Económica, destacou “a colaboración dos centros educativos, o que é fundamental para o éxito de Muros Consciente”, e convidou á hostalaría “a participar na actividade do 2 de decembro, onde coñeceremos proxectos e experiencias innovadoras en materia de economía circular”.
A campaña, promovida polo Concello de Muros coa dirección creativa do Espazo a Maceta, céntrase este ano nas estratexias de economía circular, enfocadas na xestión e redución de residuos na hostalaría local.
Segundo fixeron saber, Muros Consciente involucra a todo o concello, levando a cabo actividades como un museo en baixos sen alugar; obradoiros nos centros educativos e coa hostalaría; roteiros pola vila; actividades de lecer como o ioga; presentacións de proxectos inspiradores, e unha gala que está prevista para o vindeiro 29 de novembro, onde se reunirán varias asociacións para celebrar os beneficios que traen ao pobo co seu traballo.
“O importante dunha iniciativa deste tipo é que deixe pegada, que sirva realmente para reflexionar sobre o pobo que queremos, sobre a importancia de apoiar o noso, o máis próximo, e tamén sobre a importancia de que o comercio e a hostalaría aposten por un modelo sostíbel de negocio”, engade María Lago.
