O Concello de Boiro, que organiza o Obradoiro de Emprego Torre Goiáns IV, vén de anunciar que seleccionará ao alumnado das modalidades de Carpintería e Forestal para participar na dita iniciativa formativa que terá unha duración de nove meses, adestrándose no mesmo 20 alumnos/as traballadores.
Indo á formación, dicir que estará dividida en dúas especialidades con 10 alumnos/as en cadansúa especialidade. Por unha banda vaise impartir a especialidade de Instalacións de elementos de carpintería e pola outra a de Repoboacións forestais e tratamentos silvícolas. O alumnado contará cun contrato de traballo para formación e aprendizaxe a tempo completo de 40 horas semanais cun horario de 7.30 a 15.30 horas de luns a venres durante 9 meses.
O alumnado participante formarase de xeito teórico e tamén práctico realizando tarefas de conservación e valorización do Camiño A Orixe; cerramentos de madeira no Pazo de Goiáns; mellora das pasarelas do Camiño A Orixe ao seu paso polas praias de Barraña, Carragueiros e Mañóns; traballos de consolidación de frondosas en Goiáns, Abanqueiro e Valiño; mellora das faixas contra incendios en Brión; e tarefas de mellora da canle do río Coroño.
As persoas interesadas en participar neste obradoiro deberán estar inscritas como demandantes de emprego na Oficina de Emprego e solicitar Taller de emprego, amais de cumprir unha serie de requisitos xerais para o acceso ao emprego público e contar coa titulación precisa para acceder aos certificados de profesionalidade de nivel 2. As bases do proceso selectivo e toda a información están dispoñíbeis na web municipal de Boiro.
Engadir que para levar a cabo o Obradoiro de Emprego Torre Goiáns IV, o Concello de Boiro recibe da Consellería de Emprego, Comercio e Emigración da Xunta de Galicia unha subvención por importe de 411.928 euros para desenvolver obradoiros duais de emprego.
