A declaración de arredor de 200 entidades do país formalizando a declaración unitaria que recolle os puntos mínimos e as medidas urxentes para “mudar o rumbo do galego”, declaración lida esta semana pola xornalista Tareixa Navaza, foi en certa maneira o primeiro capítulo dunha nova batalla polo futuro da lingua que este domingo 17 de novembro celebrou en Santiago un novo episodio: unha multitudinaria manifestación convocada pola plataforma Queremos Galego na que participaron milleiros de persoas, baixo o lema Mudemos o rumbo. Polo futuro do galego. Interviñeron na Quintana (entre outras/os) o músico e escritor Xurxo Souto, a xornalista Tareixa Navaza, e o voceiro de Queremos Galego, Marcos Maceira, amais dos representantes dos principais partidos da oposición na nosa terra: BNG e PSdG.
Así, estivo presente a portavoz nacional, Ana Pontón, que declarou que “hoxe estamos aquí para dicir que amamos a nosa lingua porque o galego é un ben que temos que preservar para o noso futuro”. “Esta é a lingua que herdamos dos nosos avós e avoas, dos nosos pais e nais, e tamén é a lingua que queremos que usen os nosos fillos, fillas, netos e netas”, explicou, engadindo que “hoxe é un día para denunciar que a lingua galega está nunha situación preocupante despois de 15 anos de políticas galegófobas do Partido Popular que están poñendo contra as cordas o futuro do noso idioma”.
Con todo, Pontón amosouse optimista de cara ao futuro ao describir esta situación como “reversíbel”, xa que ve “factíbel cambiar o rumbo cun cambio de política, comezando por suprimir ese decreto da vergoña que converteu o galego nunha lingua de segunda e que está facendo que os nenos e nenas que entran pola porta da escola falando galego saian falando castelán”.
Nesta liña, reclamou que “o señor Rueda debe escoitar a preocupación que hai na sociedade galega ante a situación límite na que puxo o seu idioma, rectificar as súas políticas e ser capaces de mudas o futuro da lingua”. Ademais, quixo lembrar que “hai moitas persoas que, aínda que non o falen, tamén cren que o galego é unha parte da nosa identidade que non se pode perder”.
Apoio dos socialistas galegos
O secretario xeral do PSdeG, José Ramón Gómez Besteiro, chamou hoxe en Santiago a “reverter a situación crítica do galego logo de 15 anos de gobernos do PP”. En declaracións aos medios durante a concentración da plataforma Queremos Galego na praza da Quintana, da que o Partido Socialista forma parte, asegurou que “urxe impulsar un novo rexurdimento da nosa lingua para reverter as políticas galeguicidas do Partido Popular”.
Besteiro encabezou a representación socialista nunha manifestación na que criticou que “Feijóo e Rueda conseguiron o que non aconteceu nin nos Séculos Escuros nin durante a Longa Noite de Pedra: que o galego xa non sexaa a primeira lingua do país”, e asegurou que o PSdeG vai defender “con toda a forza” o que considera a parte “mais valiosa” da cultura galega, “un idioma que esmorece nas mans de quen ten a obriga de defendelo”. “Seremos firmes, non imos baixar os brazos”, subliñou.
O secretario xeral recordou que o PSdeG, do mesmo xeito que numerosos colectivos, leva advertindo dende o 2009 sobre “os ataques do PP á lingua valéndose da maquinaria da Xunta”, logo de “dinamitar o consenso” en política lingüística, “con medidas coas que ata Fraga se escandalizaría”.
“Agora vemos o resultado”, lamentou o líder socialista sobre unha situación “que non acontecera nuna antes”. “O PP pode estar orgulloso, vén de conseguir un fito”, dixo irónicamente sobre o alarmante descenso do número de persoas que empregan o galego na súa vida cotiá. Besteiro cualificou de “moi triste” que o galego xa non sexa o idioma con máis falantes, como foi ao longo de toda a súa historia.
Porén, o tamén portavoz do Grupo Socialista no Parlamento de Galicia insistiu no compromiso do PSdeG: “Traballaremos para darlle a volta a esa situación dramática para a nosa identidade como pobo e para a nosa cultura”.
