No marco das celebracións do 25 de Novembro, Día Internacional para a Eliminación da Violencia contra as Mulleres, o Concello de Dodro vai organizar unha viaxe de irmandade para as veciñas do concello. A fin de semana das mulleres incluirá, concretamente, unha viaxe de confraternidade polo interior de Galicia, máis polo miúdo á vila lucense de Portomarín, e celebrarase entre o 30 de novembro e o 1 de decembro. As prazas serán limitadas, polo que se recomenda formalizar a inscrición con antelación.
O prezo é de 25 euros e pagarase unha vez asignada a praza. As persoas interesadas poden anotarse os días 20, 21 e 22 de novembro no rexistro xeral do Concello. No caso de que as solicitudes superen o número de prazas, realizarase un sorteo público para adxudicalas.
