A Casa da Xuventude de Ribeira vai acoller unha xornada de educación canina a cargo da Asociación Peludonia e o Concello (Concellería de Benestar Animal). A actividade presentouse nas instalacións da Casa da Xuventude, onde se vai a impartir a xornada, Participaron Antía Alberte xunto con José Manuel Buceta da dita asociación. Impartirase o vindeiro 29 de novembro de 17:00 a 20:00 h e para informarnos e facer a inscrición haberá que facelo na propia Casa da Xuventude de Ribeira ou escribindo ao correo electrónico a xuventude@ribeira.gal.
Segundo fixeron saber, as xornadas “pretenden mellorar a comunicación dende o coñecemento e a
comprensión que se acadan cunha comunicación máis fluída, tamén abordaranse a solución de problemas de conduta con adestramento e xogo para corrixilas”. Ensinaranse rutinas de adestramento para os cans e pautas de educación e convivencia. A concelleira animou a toda a veciñanza interesada a acudir a esta xornada que será para un máximo de 50 persoas e tamén falou das dinámicas da Casa da Xuventude “que está aberta a propostas de asociacións e como non, dos mozos e mozas do concello”.
Pola outra banda, José Buceta falou dos temas a desenvolver na xornada e tamén contextualizou sobre a situación dos cánidos: “Pretendemos concienciar sobre a situación actual, estamos demandando unha especie un cambio evolutivo; hai vinte anos os cans vivían amarrados nunha cadea e agora lles estamos pedindo que saian tres veces ao día, que se comporten ben, que non
ladren para non molestar e que se leven ben con outros cans. Estámoslles pedindo un cambio evolutivo moi grande, un salto evolutivo realmente”.
Buceta, para rematar, argumentou que dende a asociación teñen un novo método de traballo partindo da base de que o adestramento tradicional “queda corto” na actual demanda da sociedade e basean o seu método no coñecemento e no estudo do comportamento canino e pretenden, a parte de concienciar sobre esa educación que é necesaria, levala á práctica nun espazo axeitado que teñen acondicionado na propia asociación.
