Este curso 2024-2025 a rapazada de Noia vai poder sacar o talento comunicativo e xornalístico que leva dentro grazas a unha nova edición (a segunda xa) do proxecto Aula nas Ondas, iniciativa concibida para achegar o mundo da radio aos máis cativos e promovida pola Concellería de Educación e Radio Líder Noia.
A través de diferentes actividades semanais, traballarase novamente a expresión oral en lingua galega mediante entrevistas a persoas recoñecidas dentro do ámbito cultural, deportivo e social da contorna noiesa. Os propios alumnos/as seleccionarán ao entrevistado/a e prepararán a entrevista na aula para, posteriormente, entrevistar á persoa convidada nos estudios de Radio Líder Noia.
As actividades da nova edición serán todos os mércores lectivos ás 12:00 h.
Os persoeiros entrevistados e os alumnos dos centros educativos participantes serán os protagonistas diante dos micrófonos de Radio Líder Noia.
Despois das boas cifras de participación da convocatoria do curso pasado, o Concello e Radío Líder confirmaron que nesta nova edición haberá máis alumnos participantes, de centros educativos ordinarios e non ordinarios, con estudantes de terceiro de Primaria a segundo de Bacharelato.
En concreto participan os seguintes centros educativo e as seguintes asociacións inclusivas: Jaime Balmes, María Assumpta, IES Campo de San Alberto, IES Virxe do Mar, Misela e A Creba.
