Esta fin de semana proseguen en Boiro as proxeccións do Ciclo de Cine Mestre Mateo, organizado pola academia galega para levar as producións galardoadas nos Mestre Mateo a toda a xeografía galega, neste caso a Boiro. A nova cita será este domingo 27 de outubro ás 19.30 horas no Centro Social de Boiro. Proxectarase un dos grandes éxitos de público e crítica do cinema galego recente: Matria, de Álvaro Gago, protagonizada por María Vázquez e a ribeirá Susana Sampedro. Centro Social de Boiro.
O Ciclo de Cine Mestre Mateo vén da man da academia galega e da Deputación da Coruña.
Matria, rodada en galego e cun elenco galego, foi obxecto de mancheas de recoñecementos, e en webs como Filmaffinity aparece no posto número 5 das preferidas polo público na colleita deste 2023.
Sinopse (Galipedia)
Ambientada nunha vila mariñeira galega, a trama segue a difícil situación de Ramona, unha muller traballadora que loita por manterse a flote. Segundo María Vázquez “Matria reflicte a vida dunhas mulleres moi fortes e poderosas, pero con pouca autoestima. Manteñen a industria na zona das Rías Baixas e tamén coidan da súa familia e da familia dos demais para que estes poidan traballar”.
