O Concello de Porto do Son, a delegación sonense da AECC (Asociación Española Contra o Cancro) e a veciñanza de Porto do Son volveron sumar forzas para conmemorar o Día Internacional da Loita Contra o Cancro da Mama.
Fixérono en dúas quendas, primeiro o pasado xoves 23 con actividades reivindicativas na estacada da Fachada Marítima de Porto do Son (baixo o lema oficial da AECC: O rosa é máis que unha cor) e segundo coa cuarta edición da andaina solidaria local (Porto do Son en Marcha Contra o Cancro) deste domingo 27 de outubro, na que participaron máis de 300 persoas, incluídos o alcalde e máis a conselleira de Política Social, a ribeirá Fabiola García, aos que se sumaron (tamén) as e os integrantes da comunidade Amicos, entidade inclusiva do Barbanza.
A andaina contou ademais coa implicación de empresas locais como Frutas Prego, que se adheriu á causa solidaria encargándose de subministrar o avituallamento para as/os camiñantes que participaron na marcha.
Novamente a recadación destinarase integramente á AECC para reforzar o seu traballo de investigación e divulgación. O percorrido solidario, de case catro quilómetros, comezou no paseo marítimo da localidade e continuou ata o Faro de Cabeiro, volvendo despois ao punto de partida.
Lembrar que no marco da marcha, a conselleira de Política Social e Igualdade, Fabiola García, e o alcalde de Porto do Son, Luis Oujo, asinaron un convenio de colaboración para a realización de obras de mellora da seguridade no Centro de Día para persoas maiores do concello. A Xunta de Galicia financiará con 50.000 euros o peche do perímetro da parcela na que se asenta o inmóbel. O Concello encargarase de contratar e executar os traballos, que consistirán na construción dun muro de formigón de arredor de 60 centímetros de altura. Ademais, instalarase un portal para o acceso rodado e peonil dotado de videoportero na entrada principal á parcela. Explicaron que esta intervención súmase a outras realizadas neste Centro de Día, sendo unha das mais recentes a construción dunha marquesiña que cubre o acceso ao inmóbel e que protexe aos usuarios do servizo cando chegan e saen.
