Unha muller apareceu morta, tirada no chan, no seu domicilio, en Santiago de Compostela, un inmoble situado no número 64 da rúa Cancelas, moi preto do centro comercial As Cancelas.
Foi un parente da vítima o que descubriu o corpo da muller. Como non dera contactado con ela, desprazouse á vivenda e atopouna tirada no chan, ferida e con moito sangue. Inmediatamente alertou ao 112, que enviou á Policía Nacional e mais a unha ambulancia medicalizada. Os sanitarios trataron de reanimar a muller, pero xa non puideron.
Tras practicar as dilixencias oportunas, o xuíz ordenou o levantamento do cadáver, que foi trasladado para lle practicar a autopsia. O resultado serán clave para esclarecer o ocorrido e poder determinar se se trata dun crime ou a muller faleceu por un accidente.
A Policía, que recolleu probas na vivenda, abriu unha investigación. Segundo lle confirmaron á Radio Galega fontes policiais, non se descarta ningunha hipótese.
