Comeza a coller impulso definitivo a décima edición do Obradoiro de Emprego Tahume, impulsado polos Concellos de Porto do Son e Ribeira para fomentar a empregabilidade da veciñanza da contorna e cuxa concesión foi confirmada o pasado verán pola Xunta. Virá con dúas especialidades: Actividades auxiliares en conservación e mellora de montes e Traballos de carpintaría de moble. Segundo confirmou o Concello de Porto do Son, nos vindeiros días a Oficina de Emprego vai realizar o filtrado de persoas candidatas para participar no Obradoiro Tahume X.
A etapa de formación en alternancia coa práctica profesional terá unha duración de 9 meses, que tamén estará dirixida á aprendizaxe, cualificación e adquisición de experiencia profesional. Desde o inicio da súa participación no obradoiro dual de emprego, o alumnado-traballador será contratado pola entidade promotora na modalidade de contrato para a formación en alternancia, polo que percibirá unha retribución equivalente ao 100% do salario mínimo interprofesional incluída a parte proporcional dunha paga e media extraordinaria.
As persoas interesadas en participar deben estar inscritas como demandantes de emprego e ter os seus datos actualizados, polo que vos recomendamos que o comprobedes na Oficina de Emprego.
Os códigos sobre os que se vai a realizar o filtrado, e que deben constar na demanda de emprego, son:
320: Escolar taller programas
330: Casa de Oficio
340: Taller de emprego
370: Outros programas de emprego formación dual
