ULA Libraría Social (na rúa da Capela da Serra de Outes) acollerá o vindeiro 30 de outubro (ás 19.30 horas) a presentación do novo libro do escritor, divulgador e profesor noiés Agustín Agra: Libro das contrarias, unha novela publicada polo selo Xerais que explora as contradicións da condición humana e os dilemas que xorden entre os afectos, a memoria e as decisións que marcan as nosas vidas.
O autor estará acompañado por Sol Agra Tuñas, deputada provincial da Coruña e responsábel de Igualdade, Lingua e Dereitos Civís, e polo poeta Ramón Blanco.
Libro das contrarias foi o gañador do XXVI Premio Ánxel Fole de Narración Curta do Concello de Lugo.
Sobre o libro (ficha de Xerais)
Cun foco sempre posto na ciencia e na arte, Libro das contrarias é unha deliciosa novela que nos convida a gozar de marabillosos lugares e a vivir situacións de emoción plena.
Cóntanos a historia de Sofía, unha prestixiosa fotógrafa, que se interna nun agreste parque nacional de Suecia onde só é posíbel subsistir durante o estío. McClaunasey, investigadora sobre o papel das mulleres na ciencia, avisa a Fátima da desaparición da amiga de ambas (Sofía). Pretende que dean con ela baseándose nunhas indicacións ocultas nos libros e poemas que, con tal finalidade, Sofía deixou á mantenta. Fátima, ornitóloga na universidade de Cornell, rexeita participar na busca por considerar imposíbel a súa localización. Porén, a mensaxe da antiga amante impúlsaa a viaxar ata Lisboa. Alí visita unha exposición fotográfica en cuxas imaxes cre recoñecer a Sofía…
O autor
Agustín Agra (Noia 1966), profesor e escritor, é unha das figuras máis destacadas do panorama actual da literatura galega. Destacan as súas contribucións á literatura de viaxes e científica, sempre comprometida coa divulgación e a defensa do medio ambiente a través do poder da palabra. O ano 2024 foi especialmente frutífero en materia de recoñecementos, xa que tamén gañou o XXVI Certame de Narración Curta Ánxel Fole, que anualmente organiza o Concello de Lugo xunto coa colaboración de Edicións Xerais de Galiza e que resolveu distinguir O livro das contrárias, de Agustín Agra.
Agustín Ángel Agra Barreiro é un escritor e biólogo de Noia. Comezou a escribir en 2003, publicando os seus primeiros textos nas revistas Alameda do Liceo de Noia e Casa da Gramática do IES Virxe do Mar de Noia, colaborando coa Asociación Cultural Barbantia e con La Voz de Bartantia. Ten publicado con notábel éxito obras infantís e xuvenís como Trampa de luz (2012, Xerais, Fóra de Xogo) ou Cor animal (2015, Kalandraka) e obras de narrativa tan destacadas como o libro de relatos Silencio, publicado en 2020. Ademais, en 2024 tamén gañou a XXIII edición do Premio Avilés de Taramancos de Relato de Aventuras por O trebón do norte.
