O paso dunha nova borrasca deixará refachos de vento superiores aos 80 km/h, choivas xeneralizadas durante a noite e a suspensión de toda a actividade deportiva no mar.
A Dirección Xeral de Emerxencias e Interior vén de activar a alerta vermella por temporal costeiro para a noite deste xoves ao venres en toda a franxa marítima de Galicia. A chegada dunha fronte asociada a unha nova borrasca provocará un rápido empeoramento do estado da mar, con ondas que poderán acadar os sete metros de altura e fortes refachos de vento tanto no litoral como en zonas altas do interior.
Segundo as previsións da Axencia Estatal de Meteoroloxía (Aemet) e de MeteoGalicia, o episodio adverso impactará con especial forza no litoral da provincia da Coruña e na Mariña lucense a partir das primeiras horas da noite, con mar combinado do noroeste de ata sete metros e vento do oeste de forza oito. No caso da costa de Pontevedra, a premonición sinala ondas de ata seis metros e refachos de suroeste de forza sete desde as primeiras horas da madrugada.
A situación marítima adversa vén precedida por avisos por vento en terra. A Coruña e Lugo atópanse esta tarde en niveis amarelo e laranxa por refachos do suroeste que superan os 70 e 80 km/h, especialmente nas comarcas do oeste e noroeste coruñés e nas cotas altas da Mariña. O cadro meteorolóxico completarase cun aumento notable da nubosidade que derivará en precipitacións xeneralizadas ao longo da madrugada en toda a comunidade, sen variacións salientables nas temperaturas.
Como medida preventiva, a Xunta cancelou todas as actividades deportivas no mar —tanto do programa escolar Xogade coma as federadas— nas áreas costeiras afectadas. A través do Centro Integrado de Atención ás Emerxencias 112 Galicia, a Consellería de Presidencia, Xustiza e Deportes deu traslado da alerta a concellos, deputacións, agrupacións de Protección Civil e clubs náuticos.
As autoridades reiteran o chamamento á poboación para extremar as precaucións: afastarise de diques, rompentes, praias e paseos marítimos, evitar calquera aproximación á liña de costa e revisar os cabos e puntos de amarre das embarcacións nos portos.
