Este vindeiro domingo, día 13 de outubro, ás 11:00 h a coordinadora CEMMA e a Asociación Veciñal Outeiro de Sobradelo organizan unha actividade formativo-divulgativa sobre a asistencia á fauna mariña ameazada, tartarugas e mamíferos mariños, na praia de Canelas, localizada na parroquia de Sobradelo, Vilagarcía de Arousa.
A actividade, de carácter formativo-divulgativa da Rede de Varamentos de Galicia, levarase a cabo pola CEMMA dentro do proxecto REVARGAL, que conta co apoio da Fundación Biodiversidad do Ministerio para la Transición Ecológica, financiado pola Unión Europea – NextGenerationEU no marco do Plan de Recuperación, Transformación e Resiliencia (PRTR), e co apoio da Consellería de Medio Ambiente e Cambio Climático da Xunta de Galicia.
Simulacro de rescate
A actividade consiste en expoñer a presenza das especies obxectivo da asistencia a encallamentos, as diferencias básicas entre tartarugas (réptiles) e lobos mariños e cetáceos (mamíferos), así como o que podemos ou debemos facer para poder asistir en primeira instancia a un animal varado.
O público obxectivo é xenérico aínda que tamén está destinado a membros de protección civil, policía local e especialistas de medio ambiente, así como aos compoñentes dos Grupos de Voluntariado de Cobertura da CEMMA, que son os grupos locais de apoio.
Para poder inscribirse será necesario mandar un correo electrónico a cemmasolicitud@gmail.com
Actividades da Asociación Veciñal Outeiro de Sobradelo
Dentro das actividades promovidas por esta asociación, este simulacro está enmarcado dentro da súa loita pola conservación da toponimia local e buscando poñer en valor a parroquia de Sobradelo e as súas praias, así como a importancia da biodiversidade que se pode atopar na zona.
