Na mañá deste martes 17 de setembro a conselleira de Medio Ambiente e Cambio Climático, Ángeles Vázquez, reuníase na Pobra do Caramiñal con representantes da Entidade Urbanística de Conservación do Polígono da Tomada e do Concello (o alcalde José Carlos Vidal e a concelleira Patricia Lojo, entre outras/os). A conselleira salientou o seu interese, e dos empresarios, por adaptar este espazo ás recomendacións recollidas pola guía para a integración paisaxística destas áreas que foi elaborada pola Xunta.
Asemade, quixo salientar a importancia o compromiso desta asociación empresarial co fermosismo, coa súa decisión de aplicar esa guía como “punto de partida e referente” para levar a cabo melloras na área industrial de cara a compaxinar as infraestruturas necesarias para o desenvolvemento das actividades económicas coa creación de espazos integrados na paisaxe.
Seguindo ese fío, Ángeles Vázquez fixo fincapé na mellora da calidade do aire ou a redución da demanda enerxética.
Lembrou ademais que a Guía de boas prácticas para a integración paisaxística das áreas empresariais, que tamén está dispoñíbel en formato dixital, subliña aspectos como o deseño xeral do polígono industrial, a integración na contorna na que se localiza, a adaptación á topografía, o coidado da imaxe dos accesos, a creación de espazos de reunión como áreas de descanso, paseos peonís, carrís bici ou a harmonización de materiais e cores. Tamén, dixo, inclúe un capítulo adicado á elaboración de proxectos de conservación para mellorar a integración paisaxística das áreas existentes e para prever o axeitado deseño das novas.
Engadiu que as Guías de boas prácticas e recomendacións datan do ano 2012, e son unha ferramenta da Xunta e o Instituto de Estudos do Territorio (IET) prevista no regulamento da Lei de protección da paisaxe de Galicia para divulgar os valores paisaxísticos da Comunidade e que certo tipo de actuacións (edificacións, peches, equipamentos de uso público, etc) poidan lograr unha boa integración e un equilibrio coa contorna onde se sitúan. Xa foron publicados 17 volumes, dispoñíbeis tamén en dixital, e hai varias guías en elaboración.
