O presidente da Deputación da Coruña, Valentín González Formoso, foi un dos participantes no foro Los Retos Económicos de Galicia, organizado por El País en Santiago de Compostela na mañá deste martes 17 de setembro, un evento no que se debateu sobre o estado de presente e futuro da economía galega. Neste contexto, González apostou por incrementar o investimento en ciencia, o impulso das enerxías renovábeis e a industria e a potenciación do rural. Estes, dixo, son os grandes retos de futuro na comunidade autónoma.
Durante a súa intervención, Formoso recoñeceu que Galicia atópase “nun bo momento”, xa que conta “indicadores positivos que amosan fortalezas como o PIB ou a creación de emprego”, sobre todo en eidos como os sectores naval, conserveiro, téxtil, da automoción, das tecnoloxías ou das enerxías. Porén, comentou, malia estas enormes “potencialidades”, Galicia ten ante si uns “retos” aos que é fundamental responder a partir dunha exhaustiva reflexión.
Como o primeiro deses retos, o presidente da Deputación citou ao ámbito do coñecemento avanzado e a ciencia. “É preciso igualar o investimento en I+D como mínimo á media estatal para, así, conseguir o obxectivo de destinar o 2% do PIB nesta disciplina, que é a tendencia na UE”, explicou Formoso, para quen “Galicia necesita potenciar todos os seus sectores a partir desa aposta polo coñecemento, xa que é a base transversal máis necesaria para poder competir nun mundo máis globalizado e innovador”.
González Formoso destacou a transcendental “concienciación da importancia da industria e a enerxía” e recalcou que “é moi difícil ver futuro nun país que aposta só polo turismo e que destina toda a súa forza ao Camiño de Santiago; todo é necesario e relevante, pero a UE marca o camiño do progreso e está baseado na industria e a enerxía”.
Formoso tamén alertou da “perda demográfica”, un reto que “xa está socializado” pero contra o que se debe combater “permitindo que os proxectos se instalen no territorio a partires de incentivos fiscais e cláusulas demográficas”. Ao seu xuízo, “é importante que as empresas poidan prestar desde o rural servizos a toda a comunidade, sen necesidade de estar nos grandes polígonos metropolitanos e tamén establecer beneficios que permitan incentivar o interese das firmas por implantarse no rural”.
Deste xeito, o presidente provincial recoñeceu que Galicia se atopa “nun momento de aposta por parte das administracións, os medios e a sociedade para conseguir que o talento non marche. Non é fácil de reter se non somos capaces de crear marcos de futuro nos que a industria e a tecnoloxía poidan progresar”, matizou Formoso, que recoñeceu o importante “labor dos medios de comunicación para trasladar estas mensaxes á poboación”.
