A Deputación da Coruña vén de convocar o XI Premio Concepción Arenal a proxectos educativos pola igualdade de xénero. O prazo de presentación de traballos estará aberto desde o 20 de setembro ata o 31 de outubro.
O certame repartirá 15.000 euros en premios: 5.000 para o gañador das tres categorías a concurso: Educación infantil; Educación primaria e Educación secundaria, bacharelato e formación profesional básica e grao medio.
Poderán participar centros educativos públicos da provincia que impartan esas tres modalidades de ensino.
O obxecto do certame é deseñar e executar proxectos educativos que procuren o desenvolvemento de habilidades para a identificación e o rexeitamento dos estereotipos sexistas que contribúen a xerar e manter a violencia de xénero, así coma a construción de esquemas alternativos que axuden a comprender e respectar a igualdade de oportunidades reais entre sexos, a igualdade de trato e a non discriminación por razón de orientación sexual e identidades de xénero.
A presentación dos proxectos e todos os trámites da convocatoria realizaranse por vía telemática a través da plataforma SUBTEL, accesíbel dende a sede electrónica da Deputación Provincial da Coruña.
As bases do certame están publicadas no BOP do 29 de agosto, en formato PDF.
