A Asemblea Local do B.N.G. lamenta profundamente a decisión de Xusto Ordóñez de deixar a responsabilidade de concelleiro na Corporación de Rianxo, onde representaba ao Grupo Municipal (G.M.) do B.N.G. O seu posto será ocupado polo seguinte na lista Francisco Rey Grille.
Coa dimisión de Xusto Ordóñez, a Corporación de Rianxo e o B.N.G. perden, segundo a nota da formación política, unha voz comprometida coa verdade, a honradez e a xustiza, principios fundamentais do traballo político. Ordóñez destacou sempre pola súa preocupación polos intereses dos veciños e veciñas de Rianxo, mantendo unha comunicación aberta e próxima a todas as persoas.
Tanto no G.M. como na Corporación, Ordóñez foi un defensor do respecto ás diferenzas, priorizando as relacións humanas afables por riba das diferenzas ideolóxicas ou de opinión.
A Asemblea Local quere expresar publicamente o seu agradecemento polo traballo desenvolvido por Xusto Ordóñez dentro da Asemblea, do Grupo Municipal do B.N.G., do Goberno Municipal e, recentemente, como portavoz do Grupo Municipal. O seu labor en áreas como Patrimonio, Deportes e Seguridade foi fundamental, introducindo novas metodoloxías de traballo que seguen marcando a actividade nestes campos.
Entre as súas contribucións máis destacadas, cabe mencionar a protección, recuperación e divulgación do patrimonio do concello, o compromiso co deporte de base e a promoción do deporte feminino, especialmente no fútbol. Tamén impulsou o deporte popular, organizando carreiras populares.
A Asemblea Local expresa o seu pesar pola dimisión de Xusto Ordóñez, recoñecendo o valor enorme da súa achega tanto ao Grupo Municipal como á Asemblea. O seu traballo político na Corporación de Rianxo foi exemplar, e os valores que defendeu, como a entrega, honradez, compromiso nacionalista, loita pola verdade e unha enorme humanidade, serán recordados.
Desde a Asemblea, deséxaselle o mellor nas súas futuras tarefas profesionais, nas súas investigacións sobre a historia de Rianxo e nas súas labores familiares e persoais.
