Este venres día 30 de agosto as rúas da vila de Noia adornaranse e acondicionaranse para celebrar a festa do Carnaval de Verán. Trátase dunha actividade festiva e creativa impulsada en colaboración pola Área de Cultura do Concello que dirixe Pepe Pérez e o sector hostaleiro (Noia en Marcha), e cuxo programa vén con diferentes temáticas segundo o emprazamento: a Feira de Abril na Alameda, a Festa Ibicenca na praza da Constitución, a Noite de Río na rúa do Curro e os anos 80 e o espírito peace & love no malecón de Gasset.
O programa inclúe actuacións musicais e unha festa da auga para os máis pequenos, entre outras actividades. Dende a organización lanzaron un chamamento a residentes e visitantes para que se disfracen do que queiran e visiten as diferentes zonas habilitadas de celebración carnavaleira (estival).
