Comezou a conta atrás para o inicio dun dos grandes acontecementos comerciais e económicos do Barbanza este verán: a feira ribeirense de oportunidades Viamare Stock, organizada unha vez máis pola Asociación de Empresarios de Ribeira co obxectivo de “reivindicar o comercio local de proximidade”. Novamente o máis relevante desta feira serán os grandes descontos dos comercios que participan, un total de 23.
A XIX edición de Viamare Stock desenvolverase unha vez máis nunha carpa habilitada na explanada do porto de Ribeira (o malecón) e contará coa presenza de 23 establecementos locais achegando as súas mellores ofertas e promocións, cada un deles co seu espazo individual personalizado (jaimas). Celebrarase dende o venres 9 até o domingo 11 de agosto en horario ininterrompido de 11 a 22 horas (venres e domingo) e de 10 a 22 horas (sábado). Contará unha vez máis co apoio do Concello de Ribeira.
Na presentación de Viamare Stock, celebrada o pasado 30 de xullo no local dos empresarios, participaron Francisco Martínez Gude, o alcalde Luís Pérez Barral e o concelleiro de Cultura Francisco Suárez-Puerta. O presidente da patronal ribeirense explicou que a feira mantén nesta nova edición os seus sinais de identidade as súas fórmulas de éxito probado (por exemplo a disposición dos stands dos establecementos) e agradeceu o apoio do Concello, que, segundo explicou, “é vital para as actividades que organizamos e que repercuten en todos os sectores e en todos os ámbitos locais”. O rexedor sinalou que Viamare Stock é “unha gran ocasión para dinamizar o comercio, atraer visitantes, achegar descontos e impulsar a economía local”. Engadiu que a Asociación de Empresarios “pode e poderá seguir contando con nós, xa que o comercio de proximidade é o que máis vida nos dá no concello”.
A convocatoria XIX de Viamare Stock será inaugurada oficialmente ás 13.00 horas do primeiro día de actividades.
Contará coa presenza dos seguintes comercios:
Complementos: Gena´s e Xade.
Deportes: Deportes Estévez, Champion Sport, Náutica A Poutada de Podium Sport.
Zapataría: Chinela e Chaira.
Zapataría infantil: Joscar.
Óptica: Federópticos Filgueira e Martínez.
Moda: El Tocador de Mujer 21, Rule´s, Ribalá Multimarca, La Urbana Store, Lolita Moda e Mmagoe.
Moda infantil: Lunares en Mayo, Rovi, El Palacio del Bebé, Lolita Kids, Lápices de Colores e Trastiños.
Lencería: Vensuca.
