A asociación da nosa comarca Amicos promove unha nova iniciativa co obxectivo de sensibilizar á sociedade sobre a importancia de protexer e conservar os ecosistemas mariños de auga doce. Baixo o nome Amiríos, a entidade está a realizar distintos obradoiros de concienciación cos rapaces e rapazas que participan en distintos campamentos de verán da Xunta de Galicia, como a sesión realizada este mércores, 14 de agosto, no Campamento Xuvenil de Espiñeira, en Boiro.
Ata alí achegáronse sete mozos e mozas da entidade, que foron os encargados de conducir un obradoiro da auga. A través desta actividade participativa, a cativada achegouse a conceptos como o ciclo da auga, o efecto do cambio climático na mesma, ou os procesos de depuración e potabilización. Todo mediante xogos e charlas conducidas polos axentes medioambientais da entidade, en colaboración con Arenaria.
Á dita sesión sumaránselle máis accións en campamentos de verán e centros educativos, que consistirán en talleres da auga e da biodiversidade dos ríos, así como saídas de campo, nos que se realizarán análises das súas augas e dos seres vivos que os habitan.
Amicos informou que a través destas dinámicas lúdicas búscase que a rapazada tome conciencia do estado dos mesmos, así como das causas que provocan a degradación destes ecosistemas. Asemade, realizaranse accións dirixidas á poboación adulta, como a instalación de puntos de información en espazos públicos de distintos puntos da zona hidrográfica
Galicia Costa, á que pertencen Santiago de Compostela e o Barbanza. Alí, os axentes ambientais de Amicos serán os encargados de informar e sensibilizar ás persoas que se aproximen.
Tódalas actuacións realizadas no marco de Amiríos teñen como finalidade
“a divulgación, a concienciación e a sensibilización co obxectivo de promover entre a sociedade comportamentos que contribúan a potenciar o valor ambiental dos ríos e a concienciar sobre a importancia da protección e conservación dos ecosistemas fluviais”.
Amais, levaranse a cabo distintas xornadas de voluntariado nos ríos Soñora, Artes, Brea, Ulla
e Sar, así como na lagoa de Carregal. Os e as voluntarias participarán de forma directa na conservación e rehabilitación ambiental destes mediante a restauración de vexetación autóctona e a erradicación de especies invasoras. Accións conducidas polas Ecobrigadas.
Proxecto Amiríos
Amiríos nace co obxectivo de promover a participación activa de toda a sociedade na conservación e mellora dos ríos, partindo dos ecosistemas mariños de auga doce da zona hidrogáfica Galicia Costa. Con este obxectivo, ao seu abeiro levaranse a cabo actividades de divulgación, sensibilización e concienciación dirixidas a cativos e adultos, así como accións de conservación e mellora de distintas masas de auga. Ditas actividades apóianse na educación ambiental, o voluntariado ambiental, a participación cidadá e a inclusión. Todas elas conducidas por persoas con discapacidade intelectual vinculadas á Asociación Amicos, impulsor deste proxecto, financiado por Augas de Galicia.
Axentes medioambientais
As persoas con discapacidade intelectual son suxeitos principais nos proxectos desenvolvidos por Amicos. Como motor da transformación social e ambiental, son os encargados de conducir as distintas actividades de sensibilización e protección ambiental.
Para desempeñar esta labor de axentes medioambientais, os mozos e mozas reciben formación especializada sobre cada tema para, posteriormente, conducir as distintas actividades. Así, no marco do proxecto Amiríos, as amicas/os asisten a cinco obradoiros formativos impartidos por Arenaria.
