Tanto Alfonso Rueda, presidente da Xunta, como Pedro Blanco, delegado do Goberno en Galicia, estiveron este mércores en Padrón co gallo do inicio da XI etapa de La Vuelta Ciclista a España, etapa que pasa por varios concellos da nosa comarca.
O titular do Goberno autonómico destacou a contribución da 79 edición de La Vuelta Ciclista a España -da que se disputan catro etapas en Galicia- como “un escaparate turístico da comunidade”. Rueda salientou que se trata dun espectáculo deportivo seguido por persoas de máis de 180 países que poderán observar os atractivos e a oferta turística de Galicia. O presidente galego fixo fincapé en que a celebración de eventos deste tipo na nosa comunidade promoven a internacionalización do turismo e permitirá seguir aumentando o número de viaxeiros que elixen Galicia como destino.
Pola súa banda, o delegado do Goberno en Galicia, Pedro Blanco, salientou a colaboración dos Corpos e Forzas de Seguridade do Estado para dar cobertura e seguridade á 79ª edición da Volta Ciclista a España ao seu paso por Galicia. Fíxoo na localidade de Padrón, punto de saída e de meta da etapa número 11 desta importante xira deportiva, onde estivo acompañado pola subdelegada do Goberno na Coruña, María Rivas. Alí agradeceu o traballo dos axentes de Garda Civil e de Policía Nacional coa organización desta proba e lembrou á cidadanía a importancia de seguir as indicacións para que a a Volta discorra con normalidade.
Antes do comezo da etapa, o delegado saudou aos 134 integrantes da Unidade de Mobilidade e Seguridade Viaria (UMSV) da Garda Civil, un equipo creado /ex profeso/ para esta competición. Este grupo emprega 92 vehículos cos que acompaña o evento deportivo durante todo o seu percorrido, coa misión de proporcionar seguridade viaria e mobilidade ao desenvolvemento da proba, así como garantir a orde pública. Este grupo compleméntase con efectivos das distintas Comandancias da Garda Civil e das Comisarías de Policía Nacional das localidades por onde discorre a competición.
En Padrón, o delegado participou tamén na homenaxe organizada pola Garda Civil ao axente Luis Fernando Villar Santos, falecido en 2023.
Media ducia de concellos da nosa comarca
A edición deste ano de La Vuelta Ciclista a España (79ª edición) pasou este mércores por varios concellos da nosa comarca: Padrón, Dodro, Rianxo, Boiro, Noia, Lousame e Rois.
Foi unha etapa de 166,5km, con inicio e final no Campus Tecnolóxico Cortizo (Padrón).
