A Consellería de Vivenda e Planificación de Infraestruturas vén de iniciar as obras de mellora do firme en varios treitos da estrada AC-303, ao seu paso polo concello de Ribeira. Esta actuación, que comezou esta semana, ten como obxectivo acondicionar a capa de rodaxe desta vía autonómica entre os puntos quilométricos 3+500 e 5+700. Os traballos completaranse co pintado da sinalización horizontal e coa reposición dos treitos de barreira de seguridade que sexan precisos.
A Consellería explicou que “para minimizar a incidencia na circulación, durante estas obras estableceuse un corte de carril no punto no que se estaba a traballar, e deuse tráfico alternativo polo outro carril”.
Esta intervención forma parte do contrato de acondicionamento do firme en 7 estradas de titularidade autonómica ao seu paso por 10 concellos da provincia da Coruña, cun investimento de máis de 3,6 M€.
Baixo este contrato, que conta cun prazo de execución de 6 meses, o obxectivo é rehabilitar o firme en varios treitos das vías de titularidade da Xunta AC-300, AC-303, AC-406, AC-432, AC-546, AC-550 e AC-552, que discorren polos concellos da Baña, Brión, Negreira, Vimianzo, Padrón, Ribeira, Rois, Santa Comba, Val do Dubra e Outes.
A este respecto, nos vindeiros días prevese o inicio das obras de acondicionamento do firme na AC-550, entre os seus quilómetros 60+200 e 68+000, xa no concello de Outes.
