As augas vilagarciás do Centro Galego de Vela volveron ofrecer un día extraordinario para a navegación, onde está a reinar o suroeste con intensidades que roldaron este venres desde os 8 ata os 12 nós.
Cambios de rumbo nos titulares dalgunhas das clases que xogan o mundial de Vilagarcía, como é o caso do Nacra 17, onde os franceses Titouan Petard e Thea Lubac arrebátanlle o posto de líderes aos seus compatriotas Thomas Proust e Eloise Clabon, que agora son terceiros. Na prata provisional atópanse os irmáns Kwinten e Lieselotte Borghijs. Os belgas están empatados a 23 puntos cos primeiros e a tres puntos do bronce.
A frota dos Nacra 17 por fin puido estrear en competición o novo formato “reaching course”, que modifica o sistema de saída tradicional por outro no que os equipos arrincan en rumbo directo de través cara á primeira baliza do percorrido. Todo un espectáculo de velocidade que permite aos catamaráns olímpicos render ao cento por cento desde o minuto un.
A este respecto, Manel Lligé, un dos máximos responsables do Mundial na auga, dicía que “a vela se moderniza e existe unha demanda social por facer máis atractivo este deporte e este novo modelo ofrece maior espectacularidade”.
Ruben Booth, fillo do mítico Mitch Booth e que se atopa en Vilagarcía como adestrador do equipo belga e británico, explica que “este novo formato cambia na súa totalidade a forma de navegar nos Nacra 17”.
En FX, co programa deportivo ao día (tres probas por xornada) as alemás Katharina Schwachhofer e Elena Stoltze manteñen a súa posición de líderes con 27 puntos, nunha categoría na que brillaron neste xoves as francesas Manon Peyre Clara-Sofia Stamminger de Moura.
As vixentes campioas do mundo xuvenil finalizaron con dous primeiros e son cuartas na clasificación xeral. Segundas, pola súa banda, son as italianas Sofia Giunchiglia e Giula Schio a dous puntos das alemás, e no bronce as danesas Rebekka Johannesen e Silje Cerup-Simonsen con 56 puntos.
As representantes españolas, Stella Enríquez e Marta Cardona, son agora sétimas na xeneral.
Os últimos en saír á auga neste terceiro día de competición foron os 49er. Os do grupo Amarelo fóronse ao campo Alfa e os do azul ao Bravo, validandon catro mangas cada frota en senllos campos. Tras tres días de competición buscando a clasificación no grupo Ouro (a metade da frota con mellores resultados), mañá comezan as súas series finais ata este domingo que finaliza o mundial.
Tetris de combinado no caixón do podio onde os tres banzos intercambiáronse dun día para outro. Tras esta terceira xornada, mandan agora os malteses Richard Schultheis e Youenn Bertin con permiso dos neozelandeses Sebastian Menzies e George Lee, que agora son terceiros. Na segunda praza sitúanse os representantes de Países Baixos, Wiebrand de Vos e Stijn Gast. Malta con 31 puntos, Países Baixos con 41 e Nova Zelandia, cun máis.
O Mundial xuvenil de 49er, 49er FX e Nacra 17 está organizado pola Real Federación Galega de Vela co patrocinio da Deputación de Pontevedra, a Xunta de Galicia e o Concello de Vilagarcía, contando tamén co apoio da Autoridade Portuaria e outras marcas colaboradoras no evento.
