Por sétimo ano consecutivo, WWF España e o Parque Nacional Illas Atlánticas de Galicia poñen en marcha unha nova campaña de voluntariado. Durante este verán, a época de maior afluencia de visitantes, solicitarase información moi valiosa sobre os posibles impactos que xeran as actividades humanas no mar nas poboacións de aves mariñas.
Acaba de arrincar unha nova edición da campaña de voluntariado organizada por WWF e o Organismo Autónomo de Parques Nacionais en Illas Atlánticas de Galicia. Unha iniciativa na que participarán 20 persoas voluntarias que se dedicarán á recollida de nova información de gran utilidade sobre as interaccións que existen entre as actividades humanas no mar e as aves mariñas neste espazo natural.
Durante a súa estancia, recollerán datos neste espazo natural sobre que tipo de embarcacións e artefactos flotantes son máis proclives a causar molestias á fauna, en que zonas e momentos do día prodúcense ou cales son as especies máis afectadas, entre outros aspectos.
Convén lembrar que esta información resulta fundamental para poder establecer boas prácticas e recomendacións que axuden a minimizar este impacto, como pode ser regular a velocidade e o tránsito da navegación en zonas sensibles ou concienciar aos visitantes sobre os problemas aos que se enfrontan as aves no espazo marítimo do Parque.
Nas edicións anteriores, formaron parte desta iniciativa preto dun centenar de persoas de diferentes zonas do territorio, que tiveron a oportunidade de coñecer de primeira man un espazo natural único, implicándose directamente na súa conservación.
Desde fai máis dunha década, WWF colabora co Parque Nacional para avanzar no desenvolvemento de medidas eficaces de conservación, con varias iniciativas. Entre elas, destaca a avaliación das diferentes interaccións entre os ecosistemas mariños e as actividades humanas ou o coñecemento e avaliación da actividade pesqueira. Así mesmo, tamén se promoven procesos de comunicación para xerar unha rede de colaboración e confianza para promover a participación dos diferentes grupos de interese.
Esta campaña desenvólvese no marco do Plan de Sensibilización e Voluntariado Ambiental do Organismo Autónomo Parques Nacionais.
