O Concello de Boiro realizou unha xornada divulgativa entre o sector hostaleiro para dar a coñecer a formación que se realiza no marco do curso de cociña das Accións Formativas para persoas Desempregadas. Na sesión participou o concelleiro de Formación e Emprego, Roberto Lojo, xunto con hostaleiros da comarca.
Na xornada as persoas convidadas participaron na degustación de once pratos elaborados integramente polos participantes no curso nos que puxeron en práctica as elaboracións aprendidas nos distintos módulos formativos cos que conta o curso. O obxectivo desta xornada foi dar a coñecer aos hostaleiros esta formación, na que os alumnos deben facer prácticas en empresas, e tamén servir para a integración laboral do alumnado.
O Certificado de Cociña, de 828 horas de duración, é de nivel 2 e está destinado a persoas que conten con estudos de nivel ESO ou competencias clave nivel 2, así como persoas que contan co certificado de profesionalidade da mesma familia nivel 1 (hostalería) e queren continuar a súa formación.
Os obxectivos destas accións formativas son mellorar a cualificación profesional das persoas traballadoras e mellorar as competencias profesionais relacionadas cos requirimentos de produtividade e competitividade das empresas, as necesidade de adaptación aos cambios nos sectores produtivos e á inserción laboral.
O Centro de Formación e Viveiro de Empresas de Espiñeira do Concello de Boiro acolle cada ano máis de 300 persoas que se forman en distintas modalidades co obxectivo de lograr unha saída laboral nos sectores produtivos máis demandados na comarca. Ademais das aulas de formación, o Concello de Boiro aposta polo emprendemento neste centro de Espiñeira, que conta cun Viveiro de Empresas e un espazo coworking que forma parte da Rede de Espazos de traballo colaborativo da Deputación da Coruña para que proxectos emprendedores poidan botar a andar a súa iniciativa empresarial.
