Un camión cisterna sufriu un accidente de tráfico, polo que se puxo en marcha unha operación para evitar un posible episodio de contaminación. Finalmente non foi necesaria, porque levaba a cisterna baleira.
O camión, dunha empresa de Santa Comba, ía recoller aceite usado para reciclar. Por causas descoñecidas, saíu fóra da estrada nunha zona de curvas e de desniveis no concello de Catoira. O condutor quedou ferido leve, con cortes nunha man. Aínda que o camión acabou envorcando na gabia, o home foi capaz de saír polo seu propio pé.
O camión quedou envorcado, a cabalo entre a gabia e un dos carrís da estrada, polo que a Garda Civil tivo que cortar parte da circulación mentres os equipos retiraban o vehículo. O accidente rexistrouse nunha zona de curvas onde adoita haber numerosos sinistros.
