O Executivo de Javier Milei despexa o futuro para os barcos galegos con cotas de pescada para 15 anos
A intención de Milei de establecer un sistema de poxa para as licitacións internacionais mantiña en tensión a frota de capital galego que pesca nos caladoiros arxentinos. De levarse a cabo a medida, as empresas galegas quedarían nunha clara posición de inferioridade á hora de competir cos xigantes asiáticos con capacidade para pagar aranceis máis altos, como é o caso da China.
Empresas e armadores respiran aliviados logo dunha negociación intensa entre o Goberno arxentino e o sector na que se logrou despexar o futuro dos buques galegos con cotas de pescada para quince anos.
A decisión beneficia 80 barcos pertencentes a unha ducia de empresas galegas que cada ano traen a Europa máis de 50.000 toneladas de peixe.
O acordo coa Arxentina sobre xestión pesqueira non está pechado, quedan cuestións aínda relevantes como as contías que cómpre aboar nos dereitos de pesca.
